Шарайна
Ұлытау облысының өнеркәсіптік кәсіпорындарына бару жөніндегі жұмыс жоспары аясында Кәсіпкерлер палатасы Өңірлік кеңесінің мүшелері Жезқазған жылу және электр энергиясын бірлесіп өндіретін станцияның жұмысымен танысты. Жұмыс сапары барысында кәсіпорынның қазіргі ахуалы, өндірістік жабдықтардың жай-күйі, инвестициялық бағдарламаның іске асырылуы және жүргізіліп жатқан жөндеу жұмыстары басты назарға алынды.
Жезқазған жылу-электр орталығы – қала тіршілігін қамтамасыз ететін стратегиялық маңызы бар нысандардың бірі. Кәсіпорын 1952 жылдан бері жұмыс істеп келеді. Жарты ғасырдан астам уақыт ішінде станция қаланың энергетикалық жүйесінің ажырамас бөлігіне айналып, тұрғын үйлерді, әлеуметтік нысандар мен кәсіпорындарды жылу және электр энергиясымен қамтамасыз етуге өз үлесін қосып келеді.
Кәсіпкерлер палатасы Өңірлік кеңесінің өкілдері кәсіпорынға бару барысында негізгі өндірістік жабдықтардың жағдайымен танысып, оларды жаңарту бағытында атқарылып жатқан жұмыстарды көрді. Мұндай тікелей кездесулер кәсіпорынның тыныс-тіршілігін сырттай бағалаумен шектелмей, өндіріс алаңындағы нақты жағдайды зерделеуге мүмкіндік береді.
Бүгінде энергетикалық нысандар үшін негізгі міндеттердің бірі – қолданыстағы жабдықтарды жаңғыртып, олардың жұмыс тиімділігі мен сенімділігін арттыру. Уақыт өте келе кез келген өндірістік құрал-жабдықтың тозуы заңды. Сондықтан энергетикалық кәсіпорындардың тұрақты жұмыс істеуі үшін техникалық жаңарту мен жөндеу жұмыстары жүйелі түрде жүргізіліп отыруы қажет. Осы бағытта 2026 жылы Жезқазған ЖЭО-да инвестициялық бағдарлама аясында бірқатар іс-шара жүзеге асырылып жатыр. Инвестициялық бағдарламаның негізгі мақсаты – кәсіпорынның жабдықтары мен өндірістік инфрақұрылымын жаңарту, олардың техникалық мүмкіндіктерін жетілдіру және станция жұмысының тұрақтылығын қамтамасыз ету.
Кәсіпкерлер палатасы Өңірлік кеңесі мүшелерінің кәсіпорынға баруының тағы бір маңызы – бизнестің өндірістік нысандармен тікелей байланысын нығайту. Әсіресе өңір экономикасының негізін құрайтын ірі өнеркәсіптік кәсіпорындардың жұмысы жергілікті бизнес-ортаның дамуына тікелей әсер етеді. Өйткені энергетика, өндіріс, көлік және қызмет көрсету салалары бір-бірімен өзара тығыз байланысты.
Энергетика саласында бүгін жасалған инвестиция – ертеңгі тұрақтылықтың кепілі. Сондықтан Жезқазған ЖЭО-ның жаңғыруы кәсіпорынның ғана емес, бүкіл қаланың болашағына бағытталған маңызды жұмыс ретінде бағаланады. Тұрақты жылу мен электр энергиясы бар жерде өндіріс те, кәсіпкерлік те, қала тіршілігі де өз ырғағын сақтайды.
#РППОБЛАСТИҰЛЫТАУ
#Регсовет
