Шарайна
Көпшілік көптен күткен ірі инфрақұрылымдық жобалардың бірі – Жезқазған–Қарағанды бағытындағы күрежолды қайта жаңғырту жұмыстары. Аптаның басында бұл жобаға ресми түрде старт берілді. Жылдар бойы тұрғындар мен жүргізушілер көтеріп келген мәселенің нақты іске айналуы – тек жол құрылысының басталуы ғана емес, Ұлытау өңірінің экономикалық және әлеуметтік дамуындағы жаңа кезеңнің басталғанын білдіреді.
Жобаның жалпы ұзындығы – 572 шақырым. Оның 335 шақырымы Ұлытау облысының аумағы арқылы өтеді. Бұл республикалық маңызы бар автожол өңірді елдің орталығымен ғана емес, Астана мен оңтүстік аймақтарды байланыстыратын негізгі көлік дәліздерінің біріне айналдырады. Сондықтан оның жаңғыртылуы жергілікті тұрғындар үшін ғана емес, күн сайын осы бағытта қатынайтын мыңдаған жүргізуші мен жолаушы үшін де маңызды.
Жол сапасы – кез келген өңірдің даму деңгейін айқындайтын басты көрсеткіштердің бірі. Заманауи әрі қауіпсіз автожолдар инвестиция тартуға, кәсіпкерлікті дамытуға, логистиканы жетілдіруге және өңіраралық байланысты нығайтуға мүмкіндік береді. Ұлытау облысы өндірістік әлеуеті жоғары аймақ болғандықтан, көлік инфрақұрылымының сапасы оның экономикалық мүмкіндіктерін толық пайдалануға тікелей әсер етеді.
Жобаның Мемлекет басшысының тікелей бақылауында болуы оның стратегиялық маңызын айқын көрсетеді. Қазіргі жоспар бойынша құрылыс 2029 жылы аяқталуы тиіс. Алайда Үкімет мердігер ұйымдармен жұмысты жеделдетіп, жолды 2028 жылы пайдалануға беру міндетін қойып отыр. Бұл мемлекет тарапынан инфрақұрылымдық жобаларды уақытылы әрі тиімді жүзеге асыруға ерекше көңіл бөлініп отырғанын аңғартады.
Жаңғырту жұмыстары аяқталғаннан кейін жол қозғалысының қауіпсіздігі артып, жол-көлік оқиғаларының қаупі азаяды. Сонымен қатар жүк тасымалының уақыты қысқарып, көлік шығындары төмендейді. Бұл өз кезегінде өңір кәсіпкерлерінің бәсекеге қабілеттілігін арттырып, жаңа инвестициялық жобалардың жүзеге асуына қолайлы жағдай қалыптастырады.
Сарапшылардың пікірінше, сапалы жол – экономикалық өсудің негізгі драйверлерінің бірі. Өйткені инфрақұрылым жақсарған сайын өндіріс орындарына қажетті логистика жеңілдейді, туризмнің дамуына мүмкіндік туады, халықтың мобильділігі артады. Ұлытау облысы үшін бұл факторлардың барлығы ерекше маңызды. Өңірдің өндірістік әлеуеті мен тарихи-туристік мүмкіндіктері заманауи көлік желісімен ұштасқанда ғана толық іске асады.
Жезқазған–Қарағанды автожолының қайта жаңғыртылуы – бір жолдың жөнделуі емес. Бұл – өңірдің болашағына салынған инвестиция, тұрғындардың қауіпсіздігіне жасалған қамқорлық және Ұлытаудың әлеуметтік-экономикалық дамуына серпін беретін стратегиялық жоба. Осындай ірі бастамалардың нәтижесінде өңірдің көлік қолжетімділігі артып, халықтың өмір сүру сапасы жақсарып, Ұлытау елдің маңызды көлік-логистикалық тораптарының біріне айналуға мүмкіндік алады.
Досан Дулығалы.
