Шарайна
Қаладағы жол инфрақұрылымы мәселесі бүгін ғана туындаған проблема емес. Бұл – бірнеше онжылдықтар бойы жиналған, шешімі кейінге шегеріліп келген күрделі түйін. Көшелердің кейбірі қазіргі талаптарға сай емес, асфальт бетінің күйі сын көтермейтін деңгейде. Дегенмен бұл жағдайдың себебі де анық: жер астындағы инженерлік желілер шамамен 50 жыл бойы жаңартылмаған. Мұндай жағдайда тек асфальт төсеу уақытша ғана шешім болып саналады.
Жылдар бойы көрінбейтін, бірақ аса маңызды жұмыстардан бас тартпау – қала дамуының басты шарты. Сол себепті өткен жылдан бастап, бірінші кезекте ескі құбырларды ауыстыру жұмысы қолға алынды. Бұл жұмыс оңай емес, жылдам нәтиже бермейді, бірақ оның маңызы өте зор: жаңартылған инженерлік желілер ұзақ мерзімді сапалы жол инфрақұрылымын қамтамасыз етеді.
Абай көшесінде жүргізіліп жатқан жұмыстар осы көзқарастың айқын көрінісі болып отыр. Бүгінгі күнге дейін 750 метр жол асфальтталып, сапалы транспорттық байланыс қалыптасты. Бұл – қаладағы жол мәселесін шешуге бағытталған нақты қадам.
«Жалпы, қала тарихында алғаш рет биыл 25 көшеге асфальт төсеу жоспарланып отыр. Бұл жай ғана көрсеткіш емес. Бұл – жылдар бойы күткен өзгерістің нақты бастамасы. Әрбір төселген көшенің артында сапалы инженерлік жүйелер мен ұзақ мерзімді шешімдер жатыр», дейді қала әкімі Мұрат Бөрібаев өзінің «Фейсбук» әлеуметтік желісіндегі парақшасында.
Қала билігі тұрғындардың сын-пікірін толық түсінеді. Шын мәнінде, халықтың күткені де, шаршағаны да орынды. Дегенмен ең бастысы – мәселе енді кейінге қалдырылмайды. Жұмыс басталды және ол міндетті түрде өз нәтижесін береді. Абай көшесіндегі инфрақұрылымды жаңарту жұмысы – тек жол жөндеу емес, қала дамуының символы. Бұл жоба тұрғындарға сапалы және қауіпсіз көлік қатынасын қамтамасыз етуге, инженерлік жүйелерді жаңартуға, ұзақ мерзімді шешімдерді енгізуге бағытталған. Жылдар бойы жиналған проблемалар енді шешімін табады. Қала билігі қала тұрғындарына уәде еткендей, өзгерістерді көрнекі түрде жеткізіп, сапалы инфрақұрылымның қалыптасуын қамтамасыз етеді. Әр асфальт төселген көшенің артында – тұрақты даму мен болашаққа жасалған инвестиция жатыр.
Досан Дулығалы.
