Шарайна
Осыдан бірер апта бұрын облыс орталығында «Өндірістегі 10 күн» акциясы ұйымдастырылы. Оның бір күні «Жаңа технология – жаңа дағды» тақырыбына арналды. Іс-шара аясында колледж өкілдері «Ютария» ЖШС-ның өндірістік базасында болып, тігін өндірісінде қолданылатын заманауи технологиялармен, автоматтандырылған жабдықтармен және цифрлық жобалау жүйелерімен танысты. Кездесудің негізгі мақсаты – білім беру мен өндіріс арасындағы байланысты нығайтып, болашақ мамандардың цифрлық дағдыларын дамыту.
Бүгінде цифрландыру өндіріс саласының ажырамас бөлігіне айналды. Заманауи бағдарламалар мен автоматтандырылған құрылғылар еңбек үдерісін жеңілдетіп қана қоймай, өнім сапасын арттыруға, уақытты тиімді пайдалануға және адам еңбегін қажет ететін қайталанатын жұмыстарды оңтайландыруға мүмкіндік береді. Әсіресе, киім өндірісінде жобалау, конструкция әзірлеу, лекало дайындау, материалдарды пішу және тігу кезеңдеріне цифрлық шешімдерді енгізудің маңызы зор.
Тәжірибе барысында қатысушылар Grafis, АСУП STILON және TETRA CAD бағдарламаларының мүмкіндіктерін зерделеді. Аталған жүйелер киім үлгілерін жобалау, конструкциялық сызбалар әзірлеу, лекало дайындау және өндірістік үдерістерді басқару бағыттарында қолданылады. Сонымен қатар автоматтандырылған пішу, материалдарды төсеу және тігін жабдықтарының жұмыс принциптері көрсетілді.
Мұндай технологиялар өндірістегі бірқатар жұмысты оңтайландыруға көмектеседі. Мәселен, цифрлық жобалау жүйелері киім үлгісін әзірлеу кезінде өлшемдерді дәл есептеп, конструкцияны өзгертуге кететін уақытты қысқартуға мүмкіндік береді. Ал автоматтандырылған пішу жабдықтары материалды ұтымды пайдалануға, қол еңбегін азайтуға және бөлшектерді белгіленген өлшемге сай дайындауға ықпал етеді. Өндірісті басқаруға арналған жүйелер жұмыс барысын үйлестіріп, тапсырмалардың орындалуын бақылауға көмектеседі.
Кездесу барысында кәсіпорын мамандарына колледжде пайдаланылатын JULIVI автоматтандырылған жобалау жүйесінің мүмкіндіктері де таныстырылды. Бұл тәжірибе екі тараптың да өзара білім алмасуына жол ашып, білім беру ұйымдарында меңгерілетін технологиялардың нақты өндірістік талаптармен үйлесімді болуына мүмкіндік берді.
Цифрландырумен қатар, өндірісте жасанды интеллектіні (ЖИ) қолдану мүмкіндіктері де өзекті бола түсуде. Жасанды интеллект өндірістік деректерді талдау, материал шығынын болжау, жабдықтардың жұмысындағы ауытқуларды анықтау және өндіріс жоспарын оңтайландыру сияқты міндеттерді шешуге көмектесе алады. Киім өндірісінде ЖИ құралдарын үлгілерді әзірлеу үдерісін қолдауға, сұранысты талдауға және материал қажеттілігін алдын ала есептеуге пайдалануға болады.
Дегенмен, жасанды интеллект маманның кәсіби білімі мен тәжірибесін алмастырмайды. Керісінше, ол маманның жұмысын жеңілдететін, ақпаратты жылдам өңдеуге және шешім қабылдауға көмектесетін құрал ретінде қарастырылуы керек. Сондықтан болашақ мамандардың дәстүрлі технологияларды меңгеруімен қатар, цифрлық бағдарламалармен жұмыс істеу, деректерді түсіну және жаңа құралдарды орынды пайдалану қабілетін қалыптастыру маңызды.
Кездесудің негізгі бағыттарының бірі – «жобалау – конструкциялау – пішу – тігу» кезеңдерін біртұтас цифрлық үдеріс ретінде оқыту мәселесі болды. Егер осы кезеңдер өзара байланысқан жүйеде ұйымдастырылса, ақпаратты қайта енгізу қажеттілігі азайып, қателердің алдын алуға және өндірістік тапсырмаларды орындау сапасын жақсартуға мүмкіндік туады. Мұндай тәсіл студенттердің теориялық білімін нақты тәжірибемен ұштастырып, еңбек нарығында сұранысқа ие маман болып қалыптасуына ықпал етеді.
«Өндірістегі 10 күн» акциясы аясындағы бұл кездесу колледж бен кәсіпорын арасындағы әріптестікті нығайтудың маңызды қадамы болды. Өндірістегі заманауи жабдықтармен танысу, мамандардың тәжірибесін зерделеу және цифрлық шешімдерді қолдану жолдарын талқылау білім алушылардың кәсіби бағдарын кеңейтеді.
Жаңа технологияны меңгеру – бүгінгі маманның бәсекеге қабілеттілігін арттыратын негізгі дағдылардың бірі. Ал цифрландыру мен жасанды интеллектіні тиімді пайдалану өндірістің өнімділігін арттырып, жұмыс сапасын жақсартуға және уақыт талабына сай жаңа кәсіби құзыреттерді қалыптастыруға жол ашады.
Ізтай Белгібайұлы.
